ഓഫീസ് മീറ്റിംഗുകൾ ഇനി വാട്സ്ആപ്പിലും! ഗ്രൂപ്പ് കോൾ ഷെഡ്യൂൾ ചെയ്യാനുള്ള ഫീച്ചർ വന്നു
മെറ്റയുടെ ഉടമസ്ഥതയിലുള്ള ഇൻസ്റ്റന്റ് മെസേജിംഗ് പ്ലാറ്റ്‌ഫോമായ വാട്സ്ആപ്പ്, ഉപയോക്താക്കൾക്കായി ഒരുപിടി പുതിയ ഫീച്ചറുകൾ അവതരിപ്പിച്ചു. ഇനി മുതൽ ഗ്രൂപ്പ് കോളുകൾ മുൻകൂട്ടി ഷെഡ്യൂൾ ചെയ്യാൻ സാധിക്കും എന്നതാണ് ഇതിൽ ഏറ്റവും പ്രധാനപ്പെട്ടത്. ഓഫീസ് ആവശ്യങ്ങൾക്കും മറ്റും വാട്സ്ആപ്പിനെ കൂടുതൽ ഉപയോഗപ്രദമാക്കുകയാണ് ഇതിലൂടെ കമ്പനി ലക്ഷ്യമിടുന്നത്.
വാട്സ്ആപ്പ് അപ്‌ഡേറ്റുകളെക്കുറിച്ച് വിവരം നൽകുന്ന ‘WABetaInfo’ എന്ന വെബ്സൈറ്റാണ് ഈ വാർത്ത പുറത്തുവിട്ടത്.
എങ്ങനെ ഗ്രൂപ്പ് കോൾ ഷെഡ്യൂൾ ചെയ്യാം?
പുതിയ അപ്‌ഡേറ്റ് അനുസരിച്ച്, വാട്സ്ആപ്പിലെ ‘Calls’ ടാബിൽ നിന്ന് ഉപയോക്താക്കൾക്ക് കോളുകൾ ഷെഡ്യൂൾ ചെയ്യാം. ‘+’ ബട്ടൺ ക്ലിക്ക് ചെയ്ത് ‘Schedule Call’ എന്ന ഓപ്ഷൻ തിരഞ്ഞെടുത്താൽ മതി. ഇതിലൂടെ നിങ്ങൾക്ക് മീറ്റിംഗിന്റെ വിഷയവും സമയവും നിശ്ചയിച്ച് സുഹൃത്തുക്കൾക്കോ സഹപ്രവർത്തകർക്കോ ക്ഷണം അയക്കാൻ സാധിക്കും.
മീറ്റിംഗുകൾ എളുപ്പത്തിൽ നിയന്ത്രിക്കാം
ഷെഡ്യൂൾ ചെയ്ത കോളുകൾ ‘Calls’ ടാബിൽ തന്നെ കാണാൻ സാധിക്കും. കൂടാതെ, വരാനിരിക്കുന്ന മീറ്റിംഗുകളുടെ ലിസ്റ്റ്, പങ്കെടുക്കുന്നവരുടെ പട്ടിക, കോൾ ലിങ്ക് എന്നിവയും ഇവിടെ ലഭ്യമാകും. മീറ്റിംഗിലേക്ക് ആരെങ്കിലും ജോയിൻ ചെയ്യുമ്പോൾ കോൾ ഉണ്ടാക്കിയ ആൾക്ക് നോട്ടിഫിക്കേഷൻ ലഭിക്കും. ഷെഡ്യൂൾ ചെയ്ത കോൾ നമ്മുടെ ഫോണിലെ കലണ്ടറിലേക്ക് നേരിട്ട് ചേർക്കാനും സാധിക്കും. മീറ്റിംഗ് തുടങ്ങുന്നതിന് മുൻപായി എല്ലാവർക്കും അലേർട്ടും ലഭിക്കും.
സൂം, ഗൂഗിൾ മീറ്റ് പോലുള്ള സൗകര്യങ്ങൾ
പ്രൊഫഷണൽ മീറ്റിംഗ് പ്ലാറ്റ്‌ഫോമുകളായ സൂം, ഗൂഗിൾ മീറ്റ് എന്നിവയിൽ കണ്ടുവരുന്ന ചില പ്രധാന ഫീച്ചറുകളും വാട്സ്ആപ്പ് പുതുതായി ഉൾപ്പെടുത്തിയിട്ടുണ്ട്.
- സംസാരിക്കാൻ ആഗ്രഹമുണ്ടെന്ന് അറിയിക്കാനായി ‘കൈ ഉയർത്താനുള്ള’ (raise hand) ഓപ്ഷൻ.
- കോളുകൾക്കിടയിൽ ഇമോജി റിയാക്ഷനുകൾ അയക്കാനുള്ള സൗകര്യം.
ഈ ഫീച്ചറുകൾ മീറ്റിംഗ് ആപ്പുകളിൽ സാധാരണമാണെങ്കിലും വാട്സ്ആപ്പ് ഉപയോക്താക്കൾക്ക് ഇത് പുതിയ അനുഭവമായിരിക്കും.
റിമോട്ട് ടീമുകളെ നിയന്ത്രിക്കുന്നതിന് ഇൻസ്റ്റന്റ് മെസേജിംഗ് ടൂളുകളെ കൂടുതൽ ആളുകൾ ആശ്രയിക്കുന്ന ഈ കാലഘട്ടത്തിലാണ് വാട്സ്ആപ്പിന്റെ പുതിയ മാറ്റങ്ങൾ. ഈയൊരു നീക്കത്തിലൂടെ, ബിസിനസ് മീറ്റിംഗുകൾക്കുള്ള ഒരു പ്രധാന പ്ലാറ്റ്‌ഫോമായി വാട്സ്ആപ്പിനെ മാറ്റാനാണ് മെറ്റ ശ്രമിക്കുന്നത്.
